قصيدة ملكوت للشاعرة منة جلال المصري

سكوت ..

الصوت بيئِن
خارج من فتحة فى باب السجن ..

ذَبذبته بتتقطع تنهيد
كارِه للسُكنة فى التوابيت ..

مرجوم ..

برتوش الحبر البهتانة
فى سطور النوتة و دى إدانة ..

مرجوم ..

و الذنب الظاهر كداب
صاحب فتحات الأبواب ..

بيخرَج صوت الأَنَّ لنور
فَيشمه الخلق دماغه تدور ..

العقل يدور و العين بتدور ..
فَتشوف تدريجى و تتشعبط
بخيوط النور ..

النور بيقل و بهشاشة
العقل عرايس شفافة ..

تأثير الأَنَّ ما بيطولهاش
و عنيها الشمع أكلها الشاش ..
فَنحتها طبول ..

” إن قال قلنا نعم و إن لم يقول “

سكوت ..

القطر يفُوت .. قُضبانه تموت
ركاب الطرقات الفاضية
بئس السانِد نعم المَسنود ..

ملكوت فَسكوت و سكوت ملكوت
الرجم خفوت ..
فى النبض المُتعالى و مَكبوت ..

ملكوت ..

فى كفوف الدم بيزرعوا توت
و حلاوته زيادة تسِم الصوت ..