نبض مصر الحرة نبض الشارع لحظة بلحظة
بقلم : أحمد صلاح
طلبتتي مني أكتب قصيدة
فآدي الورق وآدي القلم
واكتب أنا رغم الألم
لازم أقولك واعرفي
أنا قلبي وحده اللي اتظلم
أنا وحدي عايش كالسراب
أو حد مخلوق م العدم
لو كان بي شئ شبه البشر
فدا كان … ومات … أو دا اتعدم
أنا صلب واقف كالجبل
وخطير ومدفون كاللغم
و كأني بذنوبي بقيت
ممسوخ و عايش كالصنم
فمتسأليش عقلي اللي عاش
خايف ومليان بالندم
ومتسأليش قلبي اللي مات
في كام حبيب منه اتظلم
ومتطلبيش مني اني أكون
عايش على الأحلام وبس
الحلم دا محتاج حياة
مش حد عمره في يوم ما حس
أنا كل هم الدنيا صابني
عمال يزيد ولا مرة خس
على طول كده هو يفاجئني
ولا عمره حتى لنبضي جس
والدنيا عمالة تعاندني
نازلة عليا بغل طس
و أنا ماشي في دروبها كأني
تايه ومش لاقي الونس
وان عشت كام مليون سنة
هفضل كأني صايبني مس
معرفش ايه آخر الطريق
مع اني خدت الدنيا عس
لفيت أنا كل المدن غازي وفاتح للبلاد
و أسرت مية أسطول سفن
وجيوشي خرجت كالجراد
كان زادها من زاد ظلمها
وضميرها متباع في المزاد
ولا زاد عليها وقتها
غير قلب أسود م الرماد
وظلمت ناس ملهاش عدد
وأذيت كمان كل العباد
معرفش ايه كان السبب
أو ايه بقا كان المراد
و في كل أرض دخلتها
كان جوة مني حرس شداد
فعرفت إني بعدها
أقرب كتير قوي للجماد
فدخلت مرة معركة
سقطت هناك فيها الجيوش
مبقتش عارف وقتها
أهرب منين أو مين أحوش
وصرخت فين كل الحرس
فين العسس … فين الوحوش
فلا كنت سامع أي شيء
ولا حتى من صوتي الرتوش
واقف بدور ع المدد
من وسط آلاف الوشوش
والكل واقف يطعنك
و الطعن مش حبة خدوش
الطعن بيسبب ألم
و آلامها كنت أنتا معرفوش
قبل أما أحبك .. يا اللي حبك
كنز بس أنا مملكوش
دورت طول عمري عليكي
رغم الخطر .. من غير رجوع
وطريقي لو يوم اتقطع
كنت أوصله بحبة فروع
ومشيت بلا شمس وقمر
أو حتى ضي من الشموع
و دليلي كان قلبي اللي صار
عايش ك بوصلة ما بين ضلوع
ووصلتلك …..
ولقيتني ميت م الهوى والعشق جوع
والقلب اللي كان
أقوى من الحصن المنيع جوه القلوع
صاير كما الأطفال
بيجري بفرحته بين الربوع
و عنيا اللي ك الصخر القوي
فجرها نهر من الدموع
آه م الزمان اللي جمعنا انت و أنا
في غير الزمان
مقدرش ينسالي اللي عدا
أو يكفر لي اللي كان
عادل زماننا وكل شيء
فيه بيتحسب كده بالميزان
ومفيش بقا حد اتظلم
غير اللي كان ظالم زمان
و أنا بعترف
إني ظلمت بش كتير وأذيت كمان
و نسيت أو اتحديت و خونت
واتمحى من الحنان
سامحيني انا بذنبي انكتب لينا
ميجمعناش مكان
و كأني مكتوبلي إني أعيش
تايه … بلا حب و أمان
ومفيش طريق ….
وسألت كل الناس قالولي حبكم شيء مستحيل
دور بقا على حل تاني
أو كده شوفلك بديل
إنسى بقا وارضى بحياتك
والزم الصمت الجميل
كانت هتبقا حكاية حلوة
بس تاه فيها الدليل
أيوة أنا يصعب عليا
قلبك انت يكون عليل
لأجل خاطري … يخفى خاطري
وينكسر ويكون ذليل
بس هفضل ليكي أكتب
طول ما أنا جنبك خليل
يمكن الكلمات توفي
جزء من رد الجميل
ومش عايزك في يوم تايهة
ويأسه ولا محتارة
أنا عايش عشان خاطرك
واجيلك حتى بإشارة
و أملي في الحياة انت
وكل دقيقة بخسارة
دا لو هتكون بعيد عنك
و دي مش حاجة مختارة
حاولت أوصف أنا فيكي
لقيت غيرتي بتمنعني
لحد في يوم يشوف صورتك
و أنا بوصف ويسمعني
ففرضا قام بقا حبك
ساعتها مين هينفعني
ختاما لو بموت فيكي
فكل ما فيكي شجعني
