حل آخر توصل إليه أنور خشبة، صاحب ورشة نجارة، لمساعدة المقبلين على الزواج، بتصميم «عفش» بتكلفة لا تتعدى 15 ألف جنيه، مراعاة للظروف الاقتصادية التى تمر بها البلاد.
أمام ورشته الصغيرة بمنطقة جسر السويس، يقف الرجل الثلاثينى وسط فريق عمل يتابع تصنيع الأعمال الخاصة بمبادرته، وأحياناً يشارك فى تصنيعها بنفسه، 25 شقة فرشها خلال 3 أشهر من تفعيل المبادرة، وما زالت المبادرة مستمرة فى التخفيف عن كاهل المقبلين على الزواج: «أنا نجار من 20 سنة، ورثت الورشة والمهنة عن والدى، ولاحظت إن ارتفاع الأسعار خلى شباب كتير تعزف عن الزواج، فقررت إطلاق المبادرة للتخفيف من الضغط اللى بيتعرض له الشباب».
«سفرة وغرفة نوم وأنتريه» بسعر مخفض وبإمكانيات محدودة، حتى لا تصبح مشكلة تأخر الزواج سبباً فى مشكلات أكثر خطورة: «الورشة ليها زبونها، والناس بتبلّغ بعضها، عرضت الفكرة على زباينى وكله بقى يقول للتانى، لحد ما قدرت أفرش شقق كتير، وكنت سبب إن جوازات تكمل أكتر، لأن كل حاجة غليت». مبادرة «أنور» لم تعُد عليه بالخسارة، لكنه لم يربح منها: «الخامات غالية جداً، وأصحاب محلات وورش نجارة كبيرة ربحهم فى الأوضة الواحدة بيوصل أكتر من 13 ألف جنيه بتصميمها وشكلها، وده طبعاً استغلال، والشباب مش قادرين يعيشوا لما يفتحوا بيوت، عشان كده قررت أشتغل بخامات تكلفتها أقل ومكسب أقل».
الظروف الصعبة التى يمر بها المقبلون على الزواج فى الوقت الحالى لا تختلف كثيراً عن أيام زواج «أنور» الذى تزوج فى شقة متواضعة وبأثاث يقل عن الذى يقدمه لشباب هذا العصر.