سيجارة .. شعر عامي

بقلم : منة جلال 

الدنيا بتشبِه لسيجارة 

أنفاسها المحدودة أمارة ..

النفس الأول بيشدَك ..
يُعصُر رئتيك ..
روحك تهرب .. تسكُن نعليك
فَتشوف الهوا دخان مسموم ..

النفس التانى أنت تشده
فَبتصبح عبد لدى الدخان ..
الدنيا لجام حَزم رجليك
فَبترقص رعشة على القضبان ..

النفس التالت و ما بعده ..
بيشدك فَتشده روتينى
فَتكح لحد ما تتصفى ..
و لا تملك غير أنفاس جافة
بتخربش مجرى الهوا ينزف ..

الدنيا بتشبِه لسيجارة
فَتحب تشوفك متكتِف ..

فيه سجاير فرط ،
و سجاير معروفة قيمتها ..

كلها فى الآخر نهايتها ..
أعقاب لسجاير خلصانة

فيه سجاير فِـ علبها مُصانة
و سجاير تتلف فِـ بفرة ..

الدنيا يجوز تحتاج شفرة
و يجوز مفتاحها فى جيب مخروم ..

الدنيا بتشبه لسيجارة
و أنا كل ما بنوى أولعها ..
تعايرنى بنفسى المكتوم